Aurkitu zure izena
Primary tabs
Bazkoara
Grezierako paska hitzetik latineko paschalis 'pazko garaikoa' sortu zen, eta honetatik Bazkoara eta Paskoala euskal izenak. Pazkoz juduek Egiptotik alde egitea eta kristauek Kristoren heriotza eta berpiztea gogoratzen dute. Antzinako kulturetan, berriz, udaberriaren etorrera ospatzen bide zen festa honekin. Aldaerak: Paskala eta Paskoala.
Bazkoare
Grezierako paska hitzetik latineko paschalis 'pazko garaikoa' sortu zen, eta honetatik Bazkoare eta Paskoal euskal izenak. Pazkoz juduek Egiptotik alde egitea eta kristauek Kristoren heriotza eta berpiztea gogoratzen dute; antzinako kulturetan, berriz, udaberriaren etorrera ospatzen bide zen festa honekin. Jaieguna, Pazko asteaz landara, maiatzaren 17an da.
Baztan
Nafarroako harana eta maizko euskal izena Erdi Aroan. Malerrekako (N) dokumentazioan, esate baterako, Maribaztan emakume izena ageri da.
Beatasis
Zuñiga (N) herriko Andre Mariaren baseliza, Arabako mugakoa. Uzta bildu ondoan bederatziurrena egin ohi zen.
Bedaio
Tolosa (G) udalerriko auzoa eta Andre Mariaren adbokazioa. Auzoa -herria garai batean- Berastegitarrena zen eta araudi berezia izan zuen luzaz, Tolosako auzo bilakatu arte. Bertako ibaiak ere Bedaio du izena.
Begoña
Bizkaiko Andre Maria, 1903. urtean Aita Santuak Jaurerriko zaindari izendatua. Askoz lehenago, halere, 1738. urtean, Bizkaian Ama Birjina honengana zegoen jaiera edo debozio handia ikusita, Gernikako Batzarrek Jaurerriko zaindari izendatua zuten. Lehen aipamena Bilbo fundatu zutenekoa da (1300. urtekoa), hiribildua Begoñako dermioan sortu baitzuten, baina santutegia zaharragoa da.
Belate
Belateko (N) Andre Mariaren ermita antzinako monasterio bikoitzaren hondarreko aztarna zen. Monasterioan, mendatean baitzen, aterbea ematen zitzaien erromesei. Egun monasterioaren hondakinak eta Andre Mariaren baseliza besterik ez daude. Irudia Alkotz (N) herriko elizara eraman zuten.
Belatz
Erdi Aroko euskal izena. Aipamen zaharrena Abadiñoko done Bikendi elizako hilarri batekoa da, non ego Belaza irakur baitaiteke. Berez hegazti izena (Falco sp.) den hau Erdi Aroko Balkoe antroponimoaren baliokidea da.
Belita
Erdi Aroko izena; Artaxoan (N) Maria Velita ageri da, 1330ean. Ikus Bilitu, maskulinoen zerrendan.
Beltso
Erdi Aroko euskal izena. Adibidez, Iratxen (N) kausitzen dugu, XIV. mendean.
Beltz
Erdi Aroan maiztxo aurkitzen dugun euskal izena. Esaterako, Iratxen (N) ageri da 1212an. Beranduago, XIV. mendean, oso arrunta izan zen, Euskal Herriko mendebaldean Baltz itxurapean.
Beltzane
Oinarritzat beltza adjektiboa hartuta moldatu den izen berria, S. Aranaren bideko -ne atzizkia erabiliaz.
Benardiñe
S. Aranak Sabino Aranak eta Koldo Elizaldek argitaratuko Santu Izendegia-n Bernartiñe proposatu zuen gaztelaniazko Bernardino-ren baliokide femeninotzat, baina sustraitu dena Bernardiñe aldaera da. Aipatutako gaztelaniazko izena italierazko Bernardino-tik dator, zein germaniar etorkia duen Bernard izenaren txikigarria baita.
Beñate
Beñat izenaren emakumezkoentzako ordaina, XX. mendearen bigarren erdian analogiaz sortua, -e amaiera berria erabiliz
Bengoarra
Sabando (A) herriko Andre Mariaren baseliza. XX. mendearen hasieran eskola izan zen bertan; egun desagertua da.
Benin
S. Aranak proposatu zuen, Sabino Aranak eta Koldo Elizaldek argitaratuko Santu Izendegia-n, gaztelaniazko Benigno-ren baliokidetzat. Azkeneko hau latineko Benignus ('amoltsua', 'borondate onekoa') izenetik atera da. Esmirnako San Benigno izan zen Galia kristautu zuena. Jaieguna ekainaren 28an da. Baliokideak: Benigno (gaz.) eta Bénigne (fr.).
Beniñe
S. Aranak proposatu zuen, Sabino Aranak eta Koldo Elizaldek argitaratuko Santu Izendegia-n, gaztelaniazko Benigno-ren baliokide femeninotzat. Azkeneko hau latineko benignus ('amoltsua', 'borondate onekoa') izenetik atera da. Esmirnako San Benigno izan zen Galia kristautu zuena. Baliokidea: Benigna(gaz.).
Beolarra
Arluzea eta Markiz (A) herrien artean dagoen Andre Mariaren baseliza. Eraikuntzak aztarna erromanikoak izan arren maiz berriztatu dute, Ama Birjinari inguruetan dioten debozio handiak eraginda.
Bera
Nafarroako herria, Bortzerrietakoa. Pío Barojaren eta honen iloba Julio Caro Barojaren bizileku izandako Itzea etxea bertan da.