Aurkitu zure izena
Primary tabs
Bordari
Fernando Artola (Hondarribia, 1910 - 1983) bertsolari eta idazlearen goitizena.
Buiñondo
Andre Mariaren baseliza, Bergaran (G). Irudi berezia da Ama Birjinarena, Gipuzkoan ireki daitekeen bakarra baita. Sabela irekitzean haurra ikus daiteke lehenik eta honen atzean Jainkoa, eskuetan Kristo eta gurutzea dituela. Kofrakideen egunean erromeria handia egiten zen, eta zopa eta esnea banatzen.
Bureskunde
Gaztelaniazko Coronación izenaren kidea. Euskal Izendegia-n biltzen da.
Burgondo
Otxate herrixka Imiruriren ondoan (Uda / Trebiño) zegoen. Handik gertu Burgondo izeneko Andre Mariaren baseliza dago. Egungo ermita eta irudia XVII. mendekoak dira, zaharragoko beste batzuen ordezkoak. Jaia abuztuaren 15ean egiten zen.
Burne
Sabino Aranak eta Koldo Elizaldek argitaratuko Santu Izendegia-n gaztelaniazko Bruno-ren ordain femeninotzat proposaturiko izena. Baliokidea: Bruna (gaz.).
Burni
Ortzitik jaitsitako altxor preziatutzat zeukan antzinako gizonak burdina. Metal honen garrantzia hainbesterainokoa da ezen kultur aro bati izena eman baitio aurkikuntzak, Burdin Aroari hain zuzen ere. Jainko eta jainkosen tresna misteriotsua zen burdina, eta ofizio guztien gainetik goretsia sutegiko olagizonen lanbidea.
Burtzeña
Barakaldoko (B) auzoa eta Andre Mariaren adbokazioa. Eliza antzinako monasterio baten azken hondakina da. Menan ere bada izen bereko herrixka.
Buxanda
Kanpezu (A) udalerriko herria eta Andre Mariaren eliza. Herria ezaguna da bertan san Fausto Nekazariaren gorputz usteldugabea dagoelako.
Dare
Sabino Aranak eta Koldo Elizaldek argitaratuko Santu Izendegia-n proposaturiko izena.
Deba
Gipuzkoako ibaia, herria eta Andre Mariaren eliza. Azken honek sarrera erromaniko ederra du eta barruko kalostra gotiko ikusgarria. Izen zelta da Deba ('jainkosa' bide da jatorriz), eta Iberiar penintsulako, Ingalaterrako eta Frantziako hidronimian ere agertzen da, antzinako europarrentzat ibaiak jainko-jainkosatzat hartuak baitziren.
Dei
Sabino Aranak eta Koldo Elizaldek argitaratuko Santu Izendegia-n Deñe-rentzat proposaturiko gizon izena.
Delika
Amurrio (A) udalerriko herria eta Andre Mariaren adbokazioa, Nerbioi ibaiko ur-jauzitik gertu daudenak. Eliza ondoan egiten ziren Arrastaria-ko batzarrak -hau Amurriok irentsitako udalerria zen- eta bertan zin egiten zuen Aiarako jaunak.
Demiku
Bermeoko (B) auzoa eta Andre Mariaren baseliza. Udalez Bermeo bada ere, elizaz Mundakako egiten da. Jaia abenduaren 2an da.
Deñe
Sabino Aranak eta Koldo Elizaldek argitaratuko Santu Izendegia-n proposatzen da, gaztelaniazko Anunciación izenaren baliokidetzat. Ikus Anuntxi eta Iragartze.
Deunorone
Sabino Aranak eta Koldo Elizaldek argitaratuko Santu Izendegia-n gaztelaniazko Todos los Santos izenarentzat proposaturiko baliokidea. Deunneologismoaz, oro zenbatzaileaz eta emakumezkoen -ne amaiera berriaz dago osaturik.
Dogartze
Sabino Aranak eta Koldo Elizaldek argitaratuko Santu Izendegia-n proposatzen da, gaztelaniazko Deogracias-en baliokide femeninotzat. Jainkoa aipatzen zuten izenak (Deo 'Jainkoari' eta gratias 'eskerrak') erabiltzea usaiakoa zen lehen kristauen artean. Baliokidea: Deogracias (gaz.).
Dogartzi
Sabino Aranak eta Koldo Elizaldek argitaratuko Santu Izendegia-n gaztelaniazko Deogracias izenaren balio-kidetzat ematen da.
Dolkiti
Erdi Aroko izena, Gaubea (A) inguruan dokumentatua (Dolkiti 1118an Gurendes herrian ageri da). A. Irigoienen ustez latineko Dulcitius izenetik datorke. Hau Tuteran (N) aurkitutako erromatar garaiko mosaiko batean azaltzen da, besteak beste.