Aurkitu zure izena
Primary tabs
Mariabaztan
Honen osagaiak Maria eta Baztan nafar ibarraren izena dira. Sunbillan (N) aurkitu dugu, 1553an (Maria baztan).
Mariaka
Aramaioko Andre Mariaren baseliza. lehengo eraikuntza 1936an erre zen eta berria 1981ean eraiki zuten. Mandazain batek aurretik igarotzen zen bakoitzean otoitz egiten omen zion. Egun batean bidelapur batek lepoa moztu omen zion labankada batez, eta une hartan mintzo batek apaiza esnatu omen zuen, "Mariekara untzinuaz" esanez.
Mariamendaro
Honen osagaiak Maria eta Mendaro herri izena (G) dira. Malerrekako Oteitzan (Doneztebe, N) kausitu dugu, XVI. mendean (Maria mendaro de Narbarte).
Mariamikele
Maria eta gizon izena zen Mikele dira honen osagaiak. Donezteben ageri da, 1530ean (Maria mjquele).
Mariandreko
Maria eta Andreko izenak dira honen osagaiak. Pasaian (G) ageri da, 1457an (Mariandreco de Laborda). Ez dakigu bigarren izenaren oinarrian Andreo-ren Andre aldaera dugun (Andres, alegia) ala femeninoetan ohikoa den andre izen arrunta. Nolanahi ere, garbi dago bukaeran -ko atzizki hipokoristiko ezaguna dagoela.
Marianton
Mari eta Anton gizon izena dira honen osagaiak. Donezteben (N) ageri da, 1645ean (Mari anton).
Mariapaule
Maria eta Paule (Paul, Paulo) gizon izena dira honen osagaiak. Sunbillako (N) dokumentazioan ageri da, 1655ean (Maria paule de lacoyzqueta).
Mariapetriko
Honen osagaiak Maria eta Petriko izenak dira. Iturengo (N) Mariapetrikorena oikonimoaren oinarrian dago (1607tik aitzina).
Mariarano
Honen osagaiak Mari eta Arano herri izena (N) dira. Donezteben (N) 1566an aurkitu dugu lehenengoz (Mari arano Joancorena; Maria arano muger de eztebe de gaztelu; Mari arano hija de adame; Mari arano Lopetorena; Maria arano de joancote).
Mariarbel
Honen osagaiak Maria eta arbel izen arrunta dira. Donezteben (N) aurkitu dugu, XVI. mendean (Maria arbel).
Mariartze
Honen osagaiak Mari antroponimoa eta Donamariako (N) Artze auzoaren izena dira. 1590ean aurkitu dugu lehenengoz, Doneztebeko (N) dokumentazioan (Joanes de Mariarce).
Mariasunbil
Honen osagaiak Maria eta Sunbil (Sunbilla) herri izena dira. Sunbillan (N) ageri da, XVI. mendean (Maria Sunbil).
Mariaurra
Honen osagaiak Maria eta haurra izen arrunta dira. Bigarren hau haurride gazteenak eraman izan du orain arte Luzaide (N) bezalako herrietan, beste ahizpa bat ere (edo gehiago) Maria zenean, elkarrengandik bereizte aldera. Xede bera lortzeko ttipi ere erabili izan da, haundi-ri kontrajarririk, eta ez bakarrik Maria izenarekin.
Mariaxuri
Honen osagaiak Maria pertsona izena eta zuri adjektiboaren aldaera adierazkorra datekeen xuri dira. Nuinen (N) ageri da, 1546an (Maria xurj). Aldaera: Marizuri.
Maribeltz
Honen osagaiak Mari emakume izena eta beltz adjektiboa dira. Arizkungo (N) Maribeltzenea (1826) oikonimoaren oinarrian dago.
Marieder
Honen osagaiak Mari izena eta eder adjektiboa dira. 1728an Maria Ederra dokumentatzen da Pasaian (G), eta, bestalde, orain hamarkada batzuk Marieder zeritzan emakumea, Garazikoa bera (NB), ari izan zen lanean Luzaideko ostatu batean (N). Subitzan (N) Mariederrena oikonimoa zegoen XVI. mendean.
Mariederko
Marieder izenaren hipokoristikoa zela dirudi. Iturengo (N) Mariederkorena oikonimoan ageri da, 1661etik aitzina.
Marieta
Maria izenaren Erdi Aroko hipokoristikoa (Marieta, Etxabarri, N), eta Arabako herria.
Mariezkurra
Honen osagaiak Mari antroponimoa eta Ezkurra herri eta ugalde izena dira. 1539an ageri da, Ezkurrako (N) oikonimo baten oinarrian ("Joanes de mariezcurrarena").