Aurkitu zure izena
Primary tabs
Malderra
Aterperik ez dutenak babesten dituen Andre Mariaren izena. Jaieguna maiatzeko bigarren igandearen aurreko larunbatean da. Baliokidea: Nª Sª de los Desamparados (gaz.).
Mamariga
Santurtziko (B) auzoa eta Andre Mariaren ermita, gaur egun aipatu auzo horretako parrokia dena. Irudia 1650ean aurkitu zuten itsasoan. Jaia irailaren 8an da.
Mami
Jatorri iluneko izena, batzuen ustez grekoko mammé 'ama' hitzetik datorkeena. Herri-etimologia dela medio latineko mamma 'titia' hitzarekin lotu zen, eta gero inudeen zaindari bihurtu. Santi Mami III. mendeko santua da, Kapadoziakoa. Kondairak dioenez, bere burua babesteko basoan bizi izan zen, eta hain ona zen non piztia guztiak hezi baitzituen.
Mañarrieta
Aperregi ondoko Andre Mariaren baseliza, Zuia ibarrean (A). 1138an Maria Lopiz-ek Najerako (Lo) monasterioari eman zion. XIX. mendearen erdialdean desagertu zen.
Manez
Nafarroa Beherean maizkoa da Joanes-en hipokoristiko hau. Horregatik zuberotarrek manex aldaera erabili eta erabiltzen dute baxenabartarrak izendatzeko, bai eta, hedaduraz, gainerako beste euskaldun guztiak izendatzeko ere.
Mantxo
Erdi Aroko izena. XIV. mendean Otsagabitik Azkoieneraino ageri da Nafarroan.
Marauri
Uda / Trebiñoko herria eta Andre Mariaren eliza. Jaia abuztuaren 15ean da.
Mari
Euskal Mitologiako izakirik garrantzitsuena, gainerako guztien nagusia baita. Itxura eta ezizen asko ditu, baina hedatuena emakume ederrarena da. Guztiz ahaltsua da lur barruan bizi den hau eta irteteko haitzuloak erabiltzen ditu (Aketegi Aizkorrin, Mariurrika Anboton, Supelegor Gorbeian, OtsibarreGameren, e.a.).
Mariabaztan
Honen osagaiak Maria eta Baztan nafar ibarraren izena dira. Sunbillan (N) aurkitu dugu, 1553an (Maria baztan).
Mariaka
Aramaioko Andre Mariaren baseliza. lehengo eraikuntza 1936an erre zen eta berria 1981ean eraiki zuten. Mandazain batek aurretik igarotzen zen bakoitzean otoitz egiten omen zion. Egun batean bidelapur batek lepoa moztu omen zion labankada batez, eta une hartan mintzo batek apaiza esnatu omen zuen, "Mariekara untzinuaz" esanez.
Mariamendaro
Honen osagaiak Maria eta Mendaro herri izena (G) dira. Malerrekako Oteitzan (Doneztebe, N) kausitu dugu, XVI. mendean (Maria mendaro de Narbarte).
Mariamikele
Maria eta gizon izena zen Mikele dira honen osagaiak. Donezteben ageri da, 1530ean (Maria mjquele).
Mariandreko
Maria eta Andreko izenak dira honen osagaiak. Pasaian (G) ageri da, 1457an (Mariandreco de Laborda). Ez dakigu bigarren izenaren oinarrian Andreo-ren Andre aldaera dugun (Andres, alegia) ala femeninoetan ohikoa den andre izen arrunta. Nolanahi ere, garbi dago bukaeran -ko atzizki hipokoristiko ezaguna dagoela.
Marianton
Mari eta Anton gizon izena dira honen osagaiak. Donezteben (N) ageri da, 1645ean (Mari anton).
Mariapaule
Maria eta Paule (Paul, Paulo) gizon izena dira honen osagaiak. Sunbillako (N) dokumentazioan ageri da, 1655ean (Maria paule de lacoyzqueta).
Mariapetriko
Honen osagaiak Maria eta Petriko izenak dira. Iturengo (N) Mariapetrikorena oikonimoaren oinarrian dago (1607tik aitzina).
Mariarano
Honen osagaiak Mari eta Arano herri izena (N) dira. Donezteben (N) 1566an aurkitu dugu lehenengoz (Mari arano Joancorena; Maria arano muger de eztebe de gaztelu; Mari arano hija de adame; Mari arano Lopetorena; Maria arano de joancote).
Mariarbel
Honen osagaiak Maria eta arbel izen arrunta dira. Donezteben (N) aurkitu dugu, XVI. mendean (Maria arbel).
Mariartze
Honen osagaiak Mari antroponimoa eta Donamariako (N) Artze auzoaren izena dira. 1590ean aurkitu dugu lehenengoz, Doneztebeko (N) dokumentazioan (Joanes de Mariarce).
Orriak
- « lehenengoa
- ‹ aurrekoa
- 1
- 2
- 3
- 4
- 5
- 6
- hur ›
- azkena »