Aurkitu zure izena
Primary tabs
Munina
Erdi Aroko izena. 865. urtean azaltzen da Valpuestan, Munnina idatzirik. Munio, Munnio-ren aldaera femeninoa zela dirudi.
Munio
Erdi Aroan maiz aurkitzen dugu. Arabako mendebaldean antroponimorik erabilienetako bat izan zen X-XII. mendeetan, eta Bizkaian ere agertzen da dokumentaziorik zaharrenean. Nafarroan Munio Berascoiz dugu 1033. urtean.
Muntsaratz
Abadiñoko (B) Andre Mariaren ermita, Muntsaratz dorretxearen ondokoa. Aski arrunta izan da Ama Birjinaren baselizak dorreei datxezkielarik egotea. Barruan badira latinezko idazkunak dituzten bi hilarri, eta horietako batean Jauninco hitza agertzen da. Jaia irailaren 8an eta hurrengo igandean da.
Murueta
Busturiko (B) Andre Mariaren ermita, gaur egun desagertua. Elizaren aurreko zelaian zegoen.
Murugarren
Murugarren hiribilduko Andre Mariaren eliza ermita bihurtu zen Garesek (N) hura barrendu zuenean. Deierrin (N) ere bada Murugarren herria.
Muruzabal
Tirgo (Lo) herriko Andre Mariaren adbokazioa eta Nafarroako herria.
Muskia
Ataungo dermioa. Bertan ereiten omen zuten garia basajaunek. Gizakumeek ez omen zekiten ez laborea nondik lortu ez eta nola landu ere, Sanmartintxiki Muskiara joan eta gari ale batzuk eta lantzeko sekretua lapurtu zizkien arte.
Muskilda
Otsagabiko (N) Andre Mariaren baseliza. Arrunt eraikuntza ederra da, erromanikoa, irudia bezala. Hau unai batek aurkitu omen zuen mendian. Herrikoek, ebatsi zuela uste baitzuten, kartzelara eraman omen zuten unaia eta elizara irudia, baina gauez biak mendira, Muskildara, itzultzen omen ziren. Hau ikusita, herritarrek santutegia aurkikundearen lekuan eraikitzea erabaki zuten.
Musko
Erdi Aroko Amusko izenaren aldaera. Beharbada Muskitz (N) eta Muskiz (B) toponimoen oinarrian dagoke. XIV. mendean Aurizperri (N), Larraga (N) eta Mirandan (N) agertzen zaigu.
Muxika
Bizkaiko herria. Izen honetako dorretxean Andre Mariaren baseliza egon zen.
Orriak
- « lehenengoa
- ‹ aurrekoa
- 1
- 2
- 3
- 4
- 5
- 6