Aurkitu zure izena
Primary tabs
Eulogi
Sabino Aranak eta Koldo Elizaldek argitaratuko Santu Izendegia-n gaztelaniazko Eulogio-ren baliokidetzat ematen da. Jatorria grezierako Eulogios izenean du. Honen esanahia aldatu egin zen, eta 'ongi mintzo dena' adieraztetik 'bedeinkatua' adieraztera igaro zen kristauen artean. San Eulogio IX. mendean bizi izan zen iberiar penintsulan. Jaieguna urtarrilaren 9an da.
Eultza
Barañaingo (N) dermioari datxekion jaurerria, XIII. mendean hiribildua izan zena, XIV.erako hutsik bazegoen ere.
Eunate
Muruzabal (N) herriko Andre Mariaren baseliza. Nafarroako ermitarik ezagunen eta ederrenetakoa da Eunatekoa. Nabarmentzekoa da bere egitura, karratua izan beharrean elizpeak itxitako oktogonoa baita. Donejakue bidean dagoenez gero, antzina erromesen ospitalea egon zen ondoko komentuan.
Eusa
Ezkabarte (N) ibarreko herria. Aipatzekoa da bertako eliza erromaniko ederra. Nabarmentzekoa da, orobat, bere elizpe edo aterpea, Euskal Herrian horrelako gutxi baitaude. Ezkabarteko baselizetara egiten ziren beiletan Eusako gurutzea eramaten zen aurrena.
Eusebi
Sabino Aranak eta Koldo Elizaldek argitaratuko Santu Izendegia-n Eusebio-rentzat proposatutako baliokidea. Ikus izen hau.
Eustake
Sabino Aranak eta Koldo Elizaldek argitaratuko Santu Izendegia-n gaztelaniazko Eustaquio-ren baliokide femeninotzat ematen den izena.
Eustaki
Sabino Aranak eta Koldo Elizaldek argitaratuko Santu Izendegia-n gaztelaniazko Eustaquio-ren baliokidetako ematen den izena. Ikus Eustakio.
Eustase
Sabino Aranak eta Koldo Elizaldek argitaratuko Santu Izendegia-n gaztelaniazko Eustasio-ren baliokide femeninotzat ematen den izena.
Eza
Aritzala (N) herriko Andre Mariaren baseliza. Bertan monasterio bikoitza -lekaimeena bata, lekaideena bestea- eta herrixka egon ziren. Lehen aipuak XI. mendekoak dira, Gartzia Naiarakoa nafar erregeak monjeei eman zienekoak. XX. mendearen erdialdean hustu zen. 1164an Andere Landerra zeritzan emakume bat bizi zen bertan.
Ezka
Nafarroako ugaldea, Belaguan (N) jaio eta Erronkari ibarra igarotakoan ura Aragoi ibaian isurtzen duena.
Ezkaba
Ezkabarte ibarreko (N) herrixka eta mendia, Iruñeko mugakoa. Gailurrean zegoen Done Kristobare-ko ermitak XIX. mendearen hasiera arte iraun zuen zutik eta mendiaren jatorrizko izena baztertu zuen, nahiz ez erabat, El Perdón-ek Erreniega zokoratu duen era berean. Ermita zegoen tokitik hurbil oroitzapen iluneko gotorlekua dago.
Ezkai
Orbaitz (N) herriko aurkintza, XX. mendearen hasieran desagertutako herri txiki bati dagokiona. Lehendabiziko aipamena 1096. urtekoa da; XV. mendean herriko bizilagun guztiak kapareak ziren.
Ezkati
Anue ibarreko (N) herri hustua, egun aurkintza izentzat dirauena. San Nikolas eliza orain Olagueko hilerriko kapera da.
Ezkaurre
Izabako mendia; badirudi izena Ezka ugaldearenarekin erlazionaturik dagoela.
Ezker
Euskal Herrian ezker, ezkerra, ezkerro izengoitiak maiz erabili izan dira, pertsona bat ezkertia zela adierazteko.
Ezkidi
Berriobeitiko (N) aurkintza. Toponimo honen osagaiak ezki (Tilia sp.) zuhaitz izena eta -di atzizkia dira.
Ezkioga
Gipuzkoako herria, 1931n izandako agerpenengatik ezaguna. Izan ere, Anduaga izeneko lekuan Andre Maria agertu omen zitzaien neska-mutiko batzuei. Jarraitzaile asko izan zituen, 1934an Eliza Katolikoak gertaera ezetsi eta Anduaga-ra joatea debekatu zuen arte.
Ezkurra
Andre Mariari eskainitako eliza duen Basaburu Txikiko herria (N) eta ugaldea. Jaiak abuztuaren 15ean dira.