Aurkitu zure izena
Primary tabs
Begoña
Bizkaiko Andre Maria, 1903. urtean Aita Santuak Jaurerriko zaindari izendatua. Askoz lehenago, halere, 1738. urtean, Bizkaian Ama Birjina honengana zegoen jaiera edo debozio handia ikusita, Gernikako Batzarrek Jaurerriko zaindari izendatua zuten. Lehen aipamena Bilbo fundatu zutenekoa da (1300. urtekoa), hiribildua Begoñako dermioan sortu baitzuten, baina santutegia zaharragoa da.
Belate
Belateko (N) Andre Mariaren ermita antzinako monasterio bikoitzaren hondarreko aztarna zen. Monasterioan, mendatean baitzen, aterbea ematen zitzaien erromesei. Egun monasterioaren hondakinak eta Andre Mariaren baseliza besterik ez daude. Irudia Alkotz (N) herriko elizara eraman zuten.
Belatz
Erdi Aroko euskal izena. Aipamen zaharrena Abadiñoko done Bikendi elizako hilarri batekoa da, non ego Belaza irakur baitaiteke. Berez hegazti izena (Falco sp.) den hau Erdi Aroko Balkoe antroponimoaren baliokidea da.
Belita
Erdi Aroko izena; Artaxoan (N) Maria Velita ageri da, 1330ean. Ikus Bilitu, maskulinoen zerrendan.
Beltso
Erdi Aroko euskal izena. Adibidez, Iratxen (N) kausitzen dugu, XIV. mendean.
Beltz
Erdi Aroan maiztxo aurkitzen dugun euskal izena. Esaterako, Iratxen (N) ageri da 1212an. Beranduago, XIV. mendean, oso arrunta izan zen, Euskal Herriko mendebaldean Baltz itxurapean.
Beltzane
Oinarritzat beltza adjektiboa hartuta moldatu den izen berria, S. Aranaren bideko -ne atzizkia erabiliaz.
Benardiñe
S. Aranak Sabino Aranak eta Koldo Elizaldek argitaratuko Santu Izendegia-n Bernartiñe proposatu zuen gaztelaniazko Bernardino-ren baliokide femeninotzat, baina sustraitu dena Bernardiñe aldaera da. Aipatutako gaztelaniazko izena italierazko Bernardino-tik dator, zein germaniar etorkia duen Bernard izenaren txikigarria baita.
Beñate
Beñat izenaren emakumezkoentzako ordaina, XX. mendearen bigarren erdian analogiaz sortua, -e amaiera berria erabiliz
Bengoarra
Sabando (A) herriko Andre Mariaren baseliza. XX. mendearen hasieran eskola izan zen bertan; egun desagertua da.
Benin
S. Aranak proposatu zuen, Sabino Aranak eta Koldo Elizaldek argitaratuko Santu Izendegia-n, gaztelaniazko Benigno-ren baliokidetzat. Azkeneko hau latineko Benignus ('amoltsua', 'borondate onekoa') izenetik atera da. Esmirnako San Benigno izan zen Galia kristautu zuena. Jaieguna ekainaren 28an da. Baliokideak: Benigno (gaz.) eta Bénigne (fr.).
Beniñe
S. Aranak proposatu zuen, Sabino Aranak eta Koldo Elizaldek argitaratuko Santu Izendegia-n, gaztelaniazko Benigno-ren baliokide femeninotzat. Azkeneko hau latineko benignus ('amoltsua', 'borondate onekoa') izenetik atera da. Esmirnako San Benigno izan zen Galia kristautu zuena. Baliokidea: Benigna(gaz.).
Beolarra
Arluzea eta Markiz (A) herrien artean dagoen Andre Mariaren baseliza. Eraikuntzak aztarna erromanikoak izan arren maiz berriztatu dute, Ama Birjinari inguruetan dioten debozio handiak eraginda.
Bera
Nafarroako herria, Bortzerrietakoa. Pío Barojaren eta honen iloba Julio Caro Barojaren bizileku izandako Itzea etxea bertan da.
Beraskita
XII. mendean aurkitzen dugu izen hau, Nafarroan (dompna Berasquita de Guendulain). Irudi duenez gizonentzako Berasko izenaz eta -ita atzizki hipokoristikoaz osaturik dago; azkenekoaren xedea generoa adieraztea dela ematen du.
Berasko
Erdi Aroan usu aurkitzen dugun euskal izena. 1131n, esate baterako, Valpuestan agertzen da, eta 1173an Artaxoan (Berasco Aoçavala). Bele hegazti izenarekin erlazionatu izan da, baina badirudi jatorrian Bigila, Begila, Beila-tik atera den Bela antroponimo gure artean ugaria dugula. Baliokidea: Belasco, Blasco (gaz.).
Berastegi
Berastegiko (G) Eldua auzoan dagoen Andre Mariaren eliza. Herriaren lehen aipamena 1027. urtekoa da, mugen berrikusketa egin zenekoa, Nafarroako Antso erregearen agintaldian. 1524. urtean herriko batzuk elizan gotortu ziren Berastegitarren jauntxokerien aurka borrokatzeko.
Beratza
Andre Mariaren antzinako baseliza, Mendabiakoa (N). XVII. mendean Arrosarioko Andre Mariako kofrakideek konpontzeko agindua eman zioten Andres Alargunsoro harginari.
Orriak
- « lehenengoa
- ‹ aurrekoa
- 1
- 2
- 3
- 4
- 5
- 6
- hur ›
- azkena »