Aurkitu zure izena
Primary tabs
Bardoze
Lapurdiko herria eta Andre Mariaren eliza. Herriaren lehen aipamena 1193. urtekoa da, Baionako katedraleko artxibokoa.
Barezi
Busturia (B) herriko baseliza, aurrenekoz 1051n ageri dena, Axpe-ko elizarekin batera. Lehorte garaian euria eskatzeko Altamirako elizara eramaten zen Andre Mariaren irudia. Marinelek debozio handia ziotenez, barruan badira hauek egindako emaitzak. Jaia abuztuaren 5ean da.
Barkane
Osagaiak barkatu aditza eta emakume izenak sortzeko erabiltzen den -ne atzizki berria dira.
Barkoxe
Zuberoako herria eta Andre Mariaren eliza. Jaia abuztuaren 15ean da. Pierres Topet "Etxahun" (1786-1862) olerkaria hemengo semea izan zen.
Barria
Ekialdeko Lautadako Andre Mariaren komentu zaharra, Araban. Lehenengo aipamen idatzia 1217koa bada ere, eraiki aurreko mendean egin zen. Arabako Foru Aldundiak berritu du monasterioa, bera baita orain jabea. Moja bernarditek Oiongo (A) Asa auzoan dute komentu berria. Jaieguna abuztuaren 20an da.
Basabe
Naxurieta (N) herriko Andre Mariaren baseliza. Sakanako baso batek eta Gobiarango (A) herrixka batek ere Basabe dute izena.
Basagaitz
Etsain (N) herriko Andre Mariaren baseliza. Antzina lekaime komentua eta herria izan zen, baina XIV. mendearen amaieran hustu egin zen. Izenak beste orduz bertan egon zen oihana, baso gaitz-a, dakar gogora.
Basalgo
Bergara (G) herriko auzoa eta Done Jakueren elizan dagoen Andre Mariaren irudia.
Basandere
Euskal mitologiako izakia, Mariren eta Laminen ezaugarri franko biltzen dituena. Mendibetik (NB) Iratirako bidean dagoen Salbatoreko ermitan bada Basandere-rena izan omen zen ganderailua. Kondairak dioenez, Basajaunak hartu zuen baselizatik baina artzain batek bere lekura itzultzea lortu zuen, Salbatzailearen laguntzaz.
Basarri
Ignazio Eizmendi (Errezil, 1913 - Zarautz, 1999) bertsolariaren goitizena.
Basile
Sabino Aranak eta Koldo Elizaldek argitaratuko Santu Izendegia-n proposaturiko Basille izenaren aldaera.
Bata
Sabino Aranak eta Koldo Elizaldek argitaratuko Santu Izendegia-n proposaturiko Beata-ren baliokidea (Galian III. mendean martirizatutako hispaniar donea) eta zenbaki izena. Jaieguna martxoarean 8an da.
Batirtze
Sabino Aranak eta Koldo Elizaldek argitaratuko Santu Izendegia-n proposaturiko izena.
Batista
Sabino Aranak eta Koldo Elizaldek argitaratuko Santu Izendegia-n gaztelaniazko Bautista-ren baliokidetzat ematen diren bi izenetako bat dugu Batista; bestea Ugutz da (ikus sarrera hau). Jatorria latineko Baptista 'bataiatzailea' da. San Joanes bataiatzailearen alderako debozioa zaharrenetakoa da kristauen artean, Jesus bera ere bataiatu baitzuen.
Batiste
Sabino Aranak eta Koldo Elizaldek argitaratuko Santu Izendegia-n proposaturiko izena
Bazkoara
Grezierako paska hitzetik latineko paschalis 'pazko garaikoa' sortu zen, eta honetatik Bazkoara eta Paskoala euskal izenak. Pazkoz juduek Egiptotik alde egitea eta kristauek Kristoren heriotza eta berpiztea gogoratzen dute. Antzinako kulturetan, berriz, udaberriaren etorrera ospatzen bide zen festa honekin. Aldaerak: Paskala eta Paskoala.
Bazkoare
Grezierako paska hitzetik latineko paschalis 'pazko garaikoa' sortu zen, eta honetatik Bazkoare eta Paskoal euskal izenak. Pazkoz juduek Egiptotik alde egitea eta kristauek Kristoren heriotza eta berpiztea gogoratzen dute; antzinako kulturetan, berriz, udaberriaren etorrera ospatzen bide zen festa honekin. Jaieguna, Pazko asteaz landara, maiatzaren 17an da.
Baztan
Nafarroako harana eta maizko euskal izena Erdi Aroan. Malerrekako (N) dokumentazioan, esate baterako, Maribaztan emakume izena ageri da.
Beatasis
Zuñiga (N) herriko Andre Mariaren baseliza, Arabako mugakoa. Uzta bildu ondoan bederatziurrena egin ohi zen.
Bedaio
Tolosa (G) udalerriko auzoa eta Andre Mariaren adbokazioa. Auzoa -herria garai batean- Berastegitarrena zen eta araudi berezia izan zuen luzaz, Tolosako auzo bilakatu arte. Bertako ibaiak ere Bedaio du izena.
Orriak
- « lehenengoa
- ‹ aurrekoa
- 1
- 2
- 3
- 4
- 5
- 6
- hur ›
- azkena »